تاند (یکشنبه، د میزان ۲ مه) د امریکا حکومت د افغانستان په شمول د نړۍ له بیلابیلو هیوادونو ته د نري رنځ له ناروغۍ پسره د مبارزې لپاره ۲۳ میلیون ډالره مرسته اعلان کړې ده.
د ملګروملتو د خبرپاڼې پر اساس، دا مرسته د امریکا د نړیوالې پراختیايي ادارې په وسیله ورکول کېږي. د دې مرستې اته نیم میلیون ډالره په افغانستان، اوکراین او میانمار کې چې د نري رنځ له ډېر ګواښ سره مخامخ دي د دې ناروغۍ د مخنیوي پر لارو چارو ولګول کېږي.
په ۲۰۲۱م کال کې چې د طالبانو د واکمنۍ لومړی کال و، د روغتیا وزارت د نري رنځ د شاوخوا ۵۲ زره پېښو د ثبتيدو اعلان کړی و. دغه وزارت ویلي ول چې د نري رنځ له امله ۱۱ زره افغانانو ژوند له لاسه ورکړی دی. د روغتیا په برخه کې د طالبانو مسؤولان وایي چې په ټولو ولایتونو کې د نري رنځ یا توبرکلوز ناروغۍ د درملنې ۸۷۷ مرکزونه شته چې د نړیوالو مؤسسو په مرسته په وړیا توګه خدمات وړاندې کوي.
په تېرو دوو کلونو کې د نړیوالو د مرستو له کمېدو وروسته، په افغانستان کې روغتیايي خدمات هم محدود شوي دي او د روغتیا نړیوال سازمان خبرداری ورکړی چې که له دوی سره مالي مرسته ونه شي نو ښايي اته میلیون افغانان له روغتیايي خدماتو بې برخې شي.
ډاکتران وايي چې که چېرې د نري رنځ ناروغي په وخت تداوي نه شي، د اخته کس د مرګ سبب کېږي.