تاند (یکشنبه، د سنبلې ۲۶مه) ټاکل شوې ده چې افغانستان په چین کې اسیايي لوبو ته ۱۳۰ لوبغاړي ولېږي.
دا ځل به د افغانستان له لوري په ۱۳۰ لوبغاړو کې هیڅ ښځینه لوبغاړې نه وي. دا په داسې حال کې ده چې ګاونډی پاکستان دغو سیالیو ته ۵۳ ښځینه لوبغاړې استوي.
اسیايی سیالۍ د ۴۵ هیوادونو د نارینه اوښځینه لوبغاړو په ګډون د روان سپټمبر له ۲۳ څخه د چین په هانکژو ښار کې پیلیږي او د راتلونکې اکتوبر تر اتمې پورې دوام کوي.
د افغانستان د سپورت او بدنې روزنې اداره، چې د طالبانو تر کنټرول لاندې ده، وايي چې په بیلابیلو سپورتي برخو کې یې اسیايي سیالیو ته لوبغاړي چمتو کړي خو د هغوی په منځ کې ښځینه لوبغاړې نه شته.
په یو شمېر هیوادونو کې افغان ښځینه لوبغاړو هڅه پیل کړې چې د اسیايي سیالیو په ګډون په ټولو نړیوالو سیالیو کې د جلاوطنه لوبغاړو په توګه ګډون وکړي. سره له دې چې ځینو سازمانونو او شخصیتونو د دوی د دې غوښتنې ملاتړ څرګند کړی خو عملاً له دې ډول یوې غوښتنې سره نهايي موافقه نه ده شوې.