یکشنبه, جولای 14, 2024
Homeخبرونهد هند پر ځای د بهارت کلمې کارولو په هند کې غبرګونونه...

د هند پر ځای د بهارت کلمې کارولو په هند کې غبرګونونه وپارول

تاند (یکشنبه، د سنبلې ۱۹ مه) وروسته له دې چې د صدراعظم نریندا مودي په مشرۍ د هند حکومت د جي شل د سرمشریزې په بلنلیک کې د هند پر ځای د «بهارت» نوم وکاراوه، په دغه هیواد کې یې موافق او مخالف غبرګونونه وپارول.

هند ته په هندي ژبه یهارت وايي.

په هغه بلنلیک کې چې د جي ۲۰ د کوربه هیواد د ولسمشرې دروپادي مورمو له لوري استول شوی، هغې ته د «بهارت ولسمشره» لیکل شوي دي.

اغلې مورمو هم د صدراعظم مودي په شان د واکمن جنتا بهارتیا ګوند غړې ده.

که څه هم په هند کې اصلي واک د صدراعظم په لاس کې دی خو د بیلابیلو هیوادونو مشرانو ته د بلنلیکونو د استولو په شان په تشریفاتي چارو کې د ولسمشر نوم راځي.

دا کار په داسې وخت کې شوی چې په هند کې اوازې دي چې واکمن ګوند هڅه کوي چې د هیواد نوم په بهارت بدل کړي.

د ګوند نوم، بهارتیا جنتا هم له بهارت سره تړاو لري.

د هند پر ځای د بهارت د لیکلو  په خاطر د اپوزیسیون ګوند مشرانو پر بي جې پي یا بهارتیا جنتا ګوند توندې نیوکې کړي دي.

د کانګریس ګوند مشرانو دا کار د واکمن ګوند خپلسري او یو اړخیز اقدام بللی دی.

خو په دې منځ کې د هند نامتو فلمي ستوري امیتابچن په خپله ایکسپاڼه کې په بهارت د هند د نوم د بدلیدو ضمني ملاتړ کړی دی.

ده په هندي ژبه کښلي:«بهارت ماتا کې جیي» یعني پر بهارت مور دې ژوندۍ وي. ده همداراز یو درې رنګه ایموجي او سور بیرغ له خپل پوسټ سره زیات کړي دي.

د امیتابچن دا پوسټ په نیم ساعت کې ۷ زره لایکونه ترلاسه کړل.

خو په همدې منځ کې ځینو پوښتنه کړې چې امیتابچن ولې دا پوسټ کړی دی.

د هند په اساسي قانون کې یوازې په لومړۍ ماده کې د بهارت کلمه کارول شوې، نور په ټولو برخو کې دې ته هیواد ته د هندوستان کلمه کارول شوې ده.

پخوا څو ځلې هڅه شوې چې د هند نوم په بهارت واړول شي خو د هند محکمې په دې اړه له پرېکړې ډډه کړې ده.

هند د شنبې او یکشنبې (د سپټمبر ۹ او ۱۰) د نړۍ د شلو سترو اقتصاد لرونکو هیوادونو او اوروپايي اتحادیې یا د جي شل د سرمشریزې کوربه دی.

حاضردمه هند د جي شل مشري په غاړه لري.

LEAVE A REPLY

Please enter your comment!
Please enter your name here

- Advertisment -

ادب