تاند: (شنبه، د وږي ۱۱ مه ) ایراني رسنیو ویلي، چې هېواد یې په کندهار کې د خپل سپاه پاسداران استخباراتي ځواک د وژل شوي مشر قاسم سلېماني په نوم روغتون جوړوي.
د ایران د پارلمان یوه غړي جواد کریمي قدوسي ویلي، چې د یاد شوي روغتون د جوړیدو چارې روانې دي.
سرچینې په دې اړه ډېر جزییات نه دي ورکړي.
قاسم سلېماني، چې له ایرانه د باندې یې د دغه هېواد د سپاه پاسداران استخباراتي ځواک مشري کوله، په ۱۳۹۸ کې د امریکا د یوه هوایي برید پر مهال په عراق کې ووژل شو.
هغه په افغانستان کې د جمهوري نظام خلاف د طالبانو د جګړې له مهمو ملاتړو هم ګڼل کیده.
په وروستیو کې ادعا کیږي، چې د طالبانو د رژیم مشر ملا هبت الله اخندزاده د ایران د مذهبي مشر له دفتر سره د سپاه پاسداران استخباراتي ځواک له لارې نږدې اړیکې لري او هڅه کوي، چې په ځينو برخو کې د ایران د مذهبي مشر تقلید وکړي.
د طالبانو له بیا واکمنیدو سره په کندهار کې د دغه هېواد کونسلګري فعاله شوې او وخت په وخت د ایران د ځینو مهمو مناسبتونو په اړه د طالب چارواکو په ګډون غونډې کوي.