تاند: (چار شنبه، د وږي ۸ مه ) د ملي پراختیا شرکت لپاره د طالبانو چارواکو د قوشتیپې کانال د چارو د دریدو خبرونه رد کړي او ویلي، چې پر دغه کانال د دوو لویو جوړېدونکو پلونو ۹۰ سلنه چارې بشپړې شوې دي.
د یاد شرکت یوه انجینر حمیدالله ذهین ویلي، چې د دغو دواړو پلونو پاتې کارونه به په نږدې څو ورځو کې پای ته ورسېږي.
نوموړي زیاته کړې، چې په دغو پلونو کې کارول شوي رغنیز توکي د افغانستان خپل تولید دی او د جوړېدو مسولیت یې هم افغان انجینران پر غاړه لري.
د طالبانو چارواکي د یاد شوي کانال جوړیدل د خپل رژیم تر ټولو ستره اقتصادي پروژه ګڼي او وایي، چې له داخلي عوایدو یې تمویلوي.
ډېر افغانان دغې پروژې ته د طالبانو له پاملرنې خوښ دي او وایي، ښه به وي چې ټول امکانات د ایډیالوژیکو تاسیساتو پر ځای پر همداسې ملي پروژو مصرف شي.