تاند: (سې شنبه، د وږي ۷ مه ) راپورونه وایي، چې له څو ورځو راهیسې د نورستان د برګمټال په نیکموک ځنګل کې اور لګیدلی، خو چارواکي او ځایي خلک یې په کنټرول او مړ کولو نه دي توانیدلي.
یو شمېر ځايي خلکو د دغه اور د مهارولو لپاره د عاجلې مرستې غوښتنه کړې ده.
ویل کیږي، چې د سیمې د لرې والي او غره ییزو لارو له امله د مرستې رسولو هڅې خنډونو سره مخ دي.
معلومه نه ده، چې اور ولې رامنځته شوی.
د طالبانو ځایي او نورو چارواکو په دې اړه څه نه دي ویلي.
تر دې مخکې هم د افغانستان په یو شمېر ځنګلونو کې د ورته اور لګیدو خبرونه ورکړل شوي.
د طالبانو ځینې منتقدان باور لري، چې ځایي چارواکي د ورته پېښو تر شا لاس لري او د چارتراشو د مافیا په همکارۍ د اور لګیدو په پلمه د چارتراشو قاچاق او وهلو ته زمینه برابروي.
طالب چارواکي بیا داسې ادعاوې ردوي او د ځنګلونو پر ساتلو ټینګار لري.