تاند: (دوشنبه، د وږي ۶ مه ) د روسیې د ملي امنیت شورا د منشي مرستیال الکسی شوتسوف وایي، چې په افغانستان کې د ثبات ټینګښت به کلونه وخت ونیسي.
نوموړي له یوې روسي رسنۍ سره په مرکه کې ناټو او امریکا تورن کړي، چې په افغانستان کې د شل کلن پوځي حضور پر مهال یې زیاتې ناخوالې زېږولي دي.
د نوموړي په وینا، د دغه حضور پر مهال افغانستان د ترهګرۍ، افراطیت، ناقانونه مهاجرت، نیشه یي توکیو او سازمان شویو جرمونو په مرکز بدل شوی.
د دغه روسي مقام د څرګندونو له مخې، هېواد یې هڅه کوي چې د افغان ثبات د ټینګښت مزل چټک شي.
یو شمېر شنونکي بیا باور لري، چې افغانستان د ختیځ او لویدیځ د قدرتونو د سیالۍ په مرکز بدل شوی او روسیه او امریکا یې په سرکې دي.