تاند: (شنبه، د وږي ۴ مه ) د طالبانو د رژیم چارواکي کابل ته د ازبکستان د یوه دېرش کسیز پلاوي د سفر خبر ورکوي.
د طالبانو تر کنټرول لاندې باختر خبري اژانس خبر ورکړی، چې د دغه پلاوي مشري د ازبکستان د سوداګرۍ وزارت لومړی مرستیال ناظم خان خالمرادوف کوي.
سرچینه زیاتوي:« د دې هیات د دوه ورځیني سفر په ترڅ کې به د افغانستان او ازبکستان د بیلابیلو مسایلو له هغې ډلې د اقتصادي او سوادګریز اړیکو پر پرختیا د دواړو لورو ترمنځ خبرې اترې وشي.»
ازبکستان له طالبانو سره نژدې اړیکې لري خو د نورو هیوادونو په څیر يې د طالبانو حکومت په رسیمت نه دی پیژندلی.
د طالبانو له بیا واکمنیدو سره، د دوی او سیمه ییزو هېوادونو ترمنځ سوداګریزې اړیکې زیاتې شوي، چې ورسره په افغانستان کې د توکیو د ارزانه کیدو خبرونه ورکړل شوي.
خلک بیا شکایت لري، چې د بېساري اقتصادي ناورین له امله په همدغو ارزانه بیو هم د توکیو د را نیولو وس نه لري.