تاند: (شنبه، د زمري ۲۸ مه ) د هندوستان رسنیو ویلي، چې افغانستان ته یې ۲۰۰ ټنه درمل او روغتیایي توکي د مرستو په توګه استولي دي.
ویل شوي، چې دا مرستې د ملګرو ملتونو په غوښتنه شوي او موخه یې افغانانو ته د عاجلو روغتیایي خدمتونو له برابرولو سره مرسته ده.
هندوستان، تر دې مخکې افغانستان ته د شاوخوا ۵۰ زره ټنه غنمو د استولو خبر ورکړی و.
د طالبانو د رژیم چارواکو په دې اړه څه نه دي ویلي.
د دې مرستو خبر په داسې وخت ورکړل شوی، چې له افغانستان سره ورځ تربلې د نړیوالې ټولنې د بشري او روغتیایي مرستو د کمیدو ویل شوي.
څو ورځې مخکې د سره صلیب نړیوالې کمېټې وویل، چې د افغانستان له ۲۵ لویو روغتونونو سره یې مرستې ممکن کمې یا ودرول شي.