تاند: (شنبه، د زمري ۲۱ مه ) د پاکستان د لومړي وزیر شهباز دفتر ویلي، چې شریف او د اپوزیسیون مشر راجا ریاض په ګډه، انورالحق کاکړ د موقت صدراعظم په توګه معرفي کړی.
د پاکستان ولسمشر عارف علوي هم د نوموړي له ټاکل کیدو سره موافقه کړې ده.
کاکړ، چې د پاکستان د مشرانو جرګې د بهرنیو اړیکو د کمېټې رئیس و، ژر به موقته صدراعظمي پيل او د درېیو میاشتو په موده کې د پارلماني ټاکنو له ترسره کولو سره د پاکستان د نوي حکومت د رامنځته کیدو چارې بشپړې کړي.
د پاکستان ولسمشر تېره اونۍ د صدراعظم په غوښتنه پارلمان ړنګ او په دې ډول د اوسني ایتلافي حکومت د کار موده پای ته ورسوله.
دا ټاکنې په داسې مهال پلان شوي، چې د پاکستان پخوانی صدراعظم عمران خان محاکمه او تر پنځو کلونو له سیاسته منع شوی.
تمه کیږي، چې د خان په غیابت کې به د هغه سیاسي مخالفان ټاکنې وګټي.
له دې سره، معلومه نه ده چې خان به راتلونکې ټاکنې څومره وننګولی شي؟