تاند: (شنبه، د زمري ۲۱ مه ) د طالبانو د زندانونو مسوولانو نن د دوی په زندانونو کې د موجودو بندیانو شمېر ښودلی.
دوی ویلي ، چې په بندیخانو کې ورسره د پنځو مېرمنو په ګډون شپاړس بهرنیان هم بندیان دي.
دطالبانو د زندانونو د چارو د سمون د ادارې چارواکو وویل، چې د افغانستان په زندانونو کې د ټولو بندیانو شمیر شپاړس زرو ته رسیږي چې یو زر یوسل او څلور نوي پکې میرمنې دي.
طالبانو نه دي ویلي، چې په بهرنیو زندانیانو کې د کومو هېوادو اتباع شامل دي.
څه موده مخکې د امریکا د حکومت یوه ویاند وویل، چې په دوحه کې یې استازو د طالبانو پلاوي سره د خپلو بندي اتباعو د خلاصون په اړه هم خبرې کړي دي.
طالبانو د یادو بندیانو هویت نه دی ښودلی.
تازه، د افغانستان د جمهوري نظام پر مهال د ملکي هوایي چلند ادارې د مشر محمود شاه حبیبي کورنۍ ویلي، چې هغه له څه باندې یو کال راهیسې طالبانو سره بندي دی.
حبیبي، چې افغان الاصله امریکایي دی، د کورنۍ د غړو په وینا یې، طالبانو په کابل کې د القاعده شبکې د مشر ایمن الظواهري په وژلو کې دلاس لرلو په تور بندي کړی.
نوموړي د جمهوري نظام له سقوط مخکې، د ملکي هوایي چلند له ادارې استعفا کړې وه او په کابل کې د یوه بهرني شرکت سلاکار و.
د هغه کورنۍ، پر هغه د طالبانو لګول شوی تور رد کړی او ویلي، چې د خوشې کیدو او ورسره د لیدو غوښتنه لري.