تاند(جمعه، د اسد ۲۰ مه) د افغانستان د خپلواکو خبریالانو اتحادیه وايي چې طالبانو په پکتیا کې د اریانا تلویزون خبریال حبیب الله سراب او په ننګرهار کې د کلید راډیو مسوول فقیر محمد فقیرزي او خبریال جان اغا صالح نیولي دي.
دې اتحادیې د طالبانو له لوري د خبریالانو د نیونو پر دوام اندېښنه ښوولې او ویلي چې د اریانا اوکلید خبریالان پرون نیول شوي دي.
طالبانو تراوسه پورې د دغوړ خبریالانو د نیولو په اړه څه نه دي ویلي.
د افغانستان د خپلواکو خبریالانو اتحادیې له طالب چارواکو غوښتنه کړې چې د ژورنالستانو او رسنیو قضیې د «رسنیزو سرغړونو د شکایاتو څېړنې کمیسیون» له لارې تعقیب او وڅېړي.
د طالبانو د حکومت د اطلاعاتو او کلتور وزارت په ځلونو ویلي چې د خبریالانو په اړه هر ډول شکایت به یوازې د دغه کمیسیون له لارې تعقیبیږي خو له دې سره سره عموماً د طالبانو د حکومت استخبارات په خپل سر د خبریالانو نیونو ته دوام ورکوي.
د افغانستان د خبریالانو مرکز په خپله خبرپاڼه کې همداراز ویلي، په کندوز ولایت کې د سلام وطندار خبریال حسیب حساس هم نن سهار د طالبانو د استخباراتو له خوا نیول شوی دی.
تر دې مخکې تېره یکشنبه په غزني کې د باختر دولتي اژانس یو خبریال سید وحدت الله ابدالي هم د طالبانو له خوا نیول شوی و.
د افغانستان د خبریالانو مرکز وايي ابدالي په داسې تور چې د هغه په خبریالۍ پورې اړوند نه دی نیول شوی او ورڅخه پلټنې روانې دي.