تاند: ( دوشنبه، د زمري ۹ مه ) د ایران د بهرنیو چارو وزارت ویاند ناصر کنعاني وایي، چې د طالبانو رژيم سره یې د هلمند سېند د اوبو د وېش په اړه هوکړه شوې ده.
نوموړي دا خبره په یوه خبري غونډه کې وکړه، خو د هوکړې جزییات یې روښانه نه کړل.
هغه هیله وښوده، چې طالبان ورسره پر کړو هوکړو ودرېږي.
د طالبانو رژیم په دې اړه څه نه دي ویلي.
مخکې د ایران ولسمشر د دغه سېند د اوبو نه خوشې کیدو له امله طالبانو ته ګواښ کړی و، خو طالب چارواکو ویلي وو، چې هلمند سېند کې اوبه کمې شوي او ایران باید د ګواښ پر ځای په خبرو د ستونزې د حل په اړه ورسره وغږیږي.
د هلمند سېند اوبه چې د ایران د بلوچستان په سیستان کې د هامون جهيل ته بهیږي، له کلونو راهیسې د ایران او افغانستان د واکمنو حکومتونو ترمنځ د کړکېچ سبب شوي.
د ایران او افغانستان په تړون کې د ایران اوبه خور په یو عادي کال کې ۸۲۰ میلیونه متر مکعب اوبه ښودل شوي.
د هلمند سېند تړون د ۱۳۵۱ کال په کب میاشت کې د افغانستان د وخت د صدراعظم موسی شفیق او د ایران د وخت د صدراعظم امیر عباس هویدا ترمنځ لاسلیک شوی و.