تاند(سې شنبه، د زمري ۳ مه)  تاند داسې راپورونه ترلاسه کړي چې د افغانستان د طالبانو حکومت په کابل کې د پاکستان د سفارت برېښنا د ۸ ساعتونو لپاره په دې خاطر پرې کړې وه چې دغه سفارت د برېښنتا محصول نه و ورکړی.

د افغانستان د برېښنا شرکت دا اقدام د پاکستان د بهرنیو چارو وزارت له غبرګون سره مخامخ شو او د درو اوونیو لپاره یې افغانانو ته د وېزو ورکړه درولې ده.

له بلې خوا یوې باورې سرچینې تاند ته وویل چې د اسلام اباد په جي ۶ کې د هغه کس، چې له تېرو لسو کلونو راهیسې خپل کور د افغانستان سفارت ته په کرایه ورکړی و، او اوس د طالبانو د حکومت سفارت بلل کېده، د افغانستان دیپلوماتان او سفارت له دې ودانۍ څخه ایستلي او اوس سفارت په (F7/3) ناظم الدین سړک ته انتقال شوی دی.

سرچینې تاند ته همداراز وویل، د کور خاوند، چې له یوه لوېدیځ هیواده راغلی او په سفارت کې یې د پخوانیو باسلیقه دیپلوماتانو په ځای ګډوډ کسان لیدلي، په قهر شوی او ویلي یې دي چې نور نه غواړي له کور څخه یې مدرسه جوړه شي نو د ده کور باید سمدستي تخلیه شي.

سرچینه وايي چې په دې کار کې غالباً د پاکستان حکومت هم لاس درلود او ممکن په کابل کې د پاکستان پر سفارت د برېښنا د بندولو یو ډول ځواب و.

سرچینه وايي چې دا کار له دې سره سره شوی چې د افغانستان برښنا شرکت د پاکستان د سفارت برېښنا بېرته فعاله کړې ده.