تاند: ( شنبه، د سرطان ۳۱ مه) امریکایي چارواکو ویلي، چې په یوه مسلکي ارزونه کې یې بیا د طالبانو تر واک لاندې د افغانستان مرکزي بانک د دی وړ نه دی ګڼلی، چې د دغه هېواد بانکي زېرمې ور وسپاري.
رویټرز اژانس د امریکا د خزانې وزارت د سرچینو له قوله ویلي، چې په دغه بانک کې د طالبانو سیاسي اغېز او لاسوهنې دغه بانک ته د سویس په یوه بانک کې د افغان زېرمو د درېیمې برخې( درې نیم میلیارده ډالرو) د احتمالي لېږد پر وړاندې خنډ شوې.
ویل شوي، چې طالبانو د افغانستان بانک په اړه د امریکایي چارواکو قناعت نه دی ترلاسه کړی.
طالبانو په دې اړه غبرګون نه دی ښودلی، خو تل یې د دوی له واکمنیدو وروسته د افغانستان د بانکي زېرمو کنګلول غیرعادلانه ګڼلي.
دا په داسې حال کې ده، چې د افغانستان بانک په ګډون له زیاتو ادارو د مسلکي افرادو پر ځای د طالبانو د ملایانو او جنګیالیو د ګومارنې خبرونه ورکول کیږي.
امریکا وایي افغان بانکي زېرمې یې ځکه کنګل کړي، چې د طالبانو رژیم مشروعیت نه لري او تر کنټرول لاندې بانک ته یې د افغان زېرمو ستنول ګڼ خطرونه لرلای شي.