تاند: ( پنجشنبه، د سرطان ۱۵ مه) د طالبانو له لوري د قلم لار تعلیمي بنسټ د مشر مطیع الله ویسا د زنداني کیدو سل ورځې په پوره کیدو دي، خو لا هم د نوموړي برخلیک نه دی معلوم.
ښاغلی ویسا پوره ۹۷ ورځې مخکې طالبانو له کابله ونیو او بیا یې د دوی د رژیم پر ضد د فعالیتونو تور ور پورې کړ.
د نوموړي خپلوان او د تعلیمي بنسټ همکاران وایي، چې لا هم د ویسا برخلیک نه دی معلوم او نه پوهیږي، چې طالبان به له نوموړي سره آخر څه کوي؟
د بشري حقونو د څار سازمان (هیومان رایټس واچ) د ښځو د حقونو د برخې مشره هیدربار د ویسا د بندي ساتل کیدو په غبرګون کې طالبان له زده کړو سره پر جګړې تورن کړي او ویلي، چې د دغې جګړې اغېزې به پر څو افغان نسلونه وځپي.
طالبانو د ویسا د برخلیک په اړه څه نه دي ویلي.
د طالبانو مشرانو له بیا واکمنیدو مخکې یې افغان او بهرنیو لوریو ته ډاډ ورکړی و، چې له سولې وروسته به نرم دریځ خپلوي او د ښځو په ګډون د ټولو قشرونو حقونو ته به ژمن وي، خو د دوی له بیا واکمنیدو سره د میلیونونه نجونو پر وړاندې د زده کړو دروازې تړل شوي، د دې پریکړې او نورو طالب قیوداتو منتقدان بندیان شوي او ان هېواد پریښودو ته اړ شوي دي.