تاند: ( پنجشنبه، د سرطان اتمه) په داسې حال کې چې جرمني چارواکو د خطر سره مخامخ افغانانو د لیږد پروګرام بیا پیل کړی، د ویزو د ورکولو لپاره یې امنیتي تدابیر ډیر کړي دي.
د جرمني حکومت، د اپریل په میاشت کې له خطر سره مخامخ افغانانو ته د ایستلو له پروګرام څخه د ناوړه استفادې د رپوټونو له کبله ویزې وځنډولې.
د دویچه ویله د راپور له مخې، د جرمني د بهرنیو چارو وزارت ویاند ویلي چې له څو میاشتو ځنډ وروسته به پخوانیو سیمه ییزو کارکوونکو او له خطر سره مخامخ افغانانو ته د ویزو ورکولو کار د جون په ۲۶مه بیا پیل شي.
جرمني وروسته له هغه د پخوانیو سیمه ایزو همکارانو او زیان منونکو افغانانو لیږد ودراوه چې د “افراطي مهاجرت غوښتنې” شواهد وموندل.
جرمني د افغانستان د نظام له سقوط وروسته، له هغو هېوادونو و، چې زیاتو افغانانو ته یې پناه ورکړه.