تاند:( چار شنبه ، د جوزا ۱۷ مه ) د افغانستان کرکټ بورډ د لوبڅارانو د ډلګۍ غړی احمد شاه پکتین د ۲۰۲۳ کال کرکټ نړیوال جام د غوراوي پړاو سیالیو لپاره د لوبڅار په توګه ټاکل شوی دی.
کرکټ بورډ په یوه خبرپاڼه کې ویلي، چې نوموړی نن د زمبابوې په لور روان شو چېرې چې د روان کال د یو ورځنیو سیالیو د نړیوال جام لپاره د لسو لوبډلو ترمنځ د غوراوي پړاو سیالۍ ترسره کېږي.
ټاکل شوې دغه سیالۍ به د روانې جون میاشتې په ۱۸مه نېټه پیل او د راتلونکې جولای میاشتې تر ۹مې نېټې پورې به په زمبابوې کې روانې وي.
د کرکټ مینه والو پر دې پریکړې خوښي ښودلې او افغانستان ته یې ښه لاسته راوړنه ګڼلې ده.
افغان کرکټ بورډ د طالبانو له واکمنیدو سره- سره په نړیوال ډګر کې ښې لاسته راوړنې لري او مینه وال یې خوښ دي، چې طالب رژیم هم په دې برخه کې مرستندوی تمام شوی.