تاند:( سې شنبه ، د جوزا ۱۶ مه ) په کندهار کې د هېواد په سطحه د (سنوفارما) په نوم د درمل جوړونې مهمه معیاري او لویه فابریکه پرانیستل شوه.
مسوولین یې وایي، چې دا فابریکه به د درملو په برخه کې تر ډیره د هېوادوالو اړتیا پوره کړي.
د طالبانو د رژیم ویاند ذبیح الله مجاهد وایي، چې سنوفارما فابریکې سهم داران ۷۱ تنه تجاران او شرکتونه دي.
سرچینه زیاتوي: دا فابریکه به په یو شفت یعنې ۸ ساعتونو کې ۵۶۰۰۰۰۰ ګولۍ ، ۲۰۰۰۰۰۰ کپسول او
۶۰۰۰۰ بوتله شربت جوړوي.
د مجاهد په وینا، سنوفارما متعهد ده چې ۵۰ میلیونه ډالره نور هم په ۵ پاسونو کې مصرف کړي، ترڅو دا فابریکه نوره هم غني شي.
سرچینه زیاتوي: د سنوفارما دوا به په ټول هیواد کې یو قیمت لري چې په دوا لیکل شوې ده.
د سنوفارما فابریکې د دوا کیفیت او معیار له ۹۸ فیصده نیولې تر ۱۰۲ فیصده پورې ده.
سنوفارما د نړۍ په ۸۴ هېوادونو کې راجستر شوې ده.
یو شمېر افغانانو د دغې درمل جوړونکې فابریکې په پرانیستل کیدو خوښي ښودلې او په دې اړه یې د نورو هڅو غوښتنه کړې ده.