تاند:( سې شنبه ، د جوزا ۹ مه ) د امریکا د استازو جرګې د بهرنیو اړیکو د کمېټې مشر مایکل مک کال د دغه هېواد د بهرنیو چارو وزارت ته په یوه لیک کې له افغانستانه د امریکایي ځواکونو د وتو په اړه محرمو اسنادو ته، د دې کمېټې د ټولو غړو د لاسرسي غوښتنه کړې ده.
تېره اوونۍ د مک کاول تر فشار لاندې هغه او د جرګې د بهرنیو چارو د کمېټې یو شمېر نورو جګپوړو غړو ته اسنادو ته د لاسرسي اجازه ورکړل شوه، خو د بهرنیو چارو وزارت د کمېټې نورو غړو ته چې په افغانستان کې یې دنده ترسره کړې، د ورته لاسرسي له ورکولو ډډه وکړه.
په دې لیک کې مک کال دا هم ویلي چې د دې اسنادو د طبقه بندي کولو لپاره کافي اساس نشته او د بایډن له ادارې یې غوښتي چې دا اسناد افشا کړي او د امریکا خلکو ته یې وسپاري.
هغه پر دې ټکي له ټينګار سره چې له افغانستان څخه د وتو د سندونو خپرول د امريکا ملي امنيت ته ګواښ نه کوي، څرګنده کړه چې د دغو سندونو خپرول به د حکومت د بهرني سياست په پرېکړو باندې د امريکايانو د باور په رامنځته کولو کې ګټور وي.
د امریکا پر حکومت دا فشارونه په داسې مهال په زیاتیدو دي، چې ولسمشریزې ټاکنې یې په مخکې دي.
د شنونکو په باور، له افغانستانه د نامسوولانه او شرمونکي وتو مسئله به د امریکا حکومت ته په دغو ټاکنو کې یوه ننګونکې موضوع وي.