تاند:( یکشنبه ، د جوزا ۷ مه ) د عبدالرشید دوستم یوه مشهور قومندان نظام الدین قیصاري، چې اوس یې دوستم سره اړیکې ترینګلې دي او طالبانو سره یو ځای شوی، دوستم په ۱۳ میلیونه ډالره پر ازبکستان د یوې داعشۍ ښځې په پلورلو تورن کړ.
قیصاري ادعا وکړه، چې دغه ښځه بهرنۍ وه او ده د داعش خلاف د جګړې پر مهال د افغانستان په شمال کې نیولې وه.
نظام الدین قیصاري د جمهوري نظام پر مهال یوه موده د فاریاب په قیصار ولسوالۍ کې د ولسي پاڅونوالو قومندان و.
د ده په وینا، یاده بهرنۍ ښځه یې د عملیاتو پر مهال ونیوله، چې رشید دوستم پر ازبکستان پر ۱۳ میلیونه ډالره وپلورله، خو ده ته یې د ژمنې خلاف د ښځې خرڅولو نېمایي پیسې ورنه کړې.
قیصاري، چې اوس د طالبانو له لوري د کابل د پخواني والي په ورکړي ۴ پوړیز کور کې ژوند کوي او د هغوی له لوري د حجرې او کور لګښتونه ورکول کیږي، پر دوستم او جمهوري نظام نور تورونه هم پورې کړل.
دوستم د نوموړي د دغه تور په اړه څه نه دي ویلي.
د ازبکستان د چارواکو نظر هم په دې اړه نه دی څرګند شوی.