تاند:( یکشنبه ، د جوزا ۷ مه ) د افغانستان د بریښنا شرکت پخوانی اجرائیه رئیس امان الله غالب د جمهوري نظام د پارلمان وروستی رئیس میر رحمان رحماني د تېلو مافیا اړوند وباله او ویې ویل، چې دغې مافیا د بریښنا شرکت د چارو مزاحمت کاوه.
نوموړي په یوه ټلویزوني مرکه کې وویل، چې د رحماني نیږدې کسان ډېر ځله ورغلي او د تېلو د مافیا له اړوندو خلکو سره یې د ده د همکارۍ غوښتنه کوله.
د غالب په وینا، نورو وکیلانو هم د تېلو مافیا سره لاره لرله، خو ده د هغو نومونه وانخیستل.
میر رحمان رحماني د پروان ولایت وکیل و او ډېر ځله په پروان کې د بریښنا پایو د الوزولو خبرونه ورکول کیدل.
پر رحماني تر دې مخکې هم ورته تورونه لګول شوي وو.
رحماني په افغانستان کې د تېلو له مهمو واردونکو سوداګرو څخه ګڼل کیده.
هغه دغو تورونو ته کوم غبرګون نه دی ښودلی.