تاند:( چار شنبه ، د جوزا ۳ مه ) د روغتیا نړیوال سازمان ټینګار کړی، چې دغه سازمان او نور ملګري به یې په افغانستان کې خپلو مرستو او همکاریو ته دوام ورکړي.
د دغه سازمان په یوه اعلامیه کې راغلي، چې یوازې د روان کال په اپریل میاشت کې شاوخوا ۶۰۰ زره کسانو د دغې ادارې تر چتر لاندې روغتیايي مرکزونو کې مرستې ترلاسه کړې دي.
د روغتیا نړیوال سازمان په دې وروستیو کې په افغانستان کې د “ډینګي تبې” احتمالي زیاتوالی اعلان کړی دی.
تر دې مخکې د خوړو نړیوال پروګرام او نورو نړیوالو مرستندویه موسسو هم په افغانستان کې د خپلو فعالیتونو د دوام اعلان کړی و.
شاوخوا دوه اونۍ وړاندې د روغتیا نړیوال سازمان پر افغان کورنیو غږ وکړ چې خپل ماشومان د پولیو ضد واکسین کړي.
دغه سازمان د افغانستان له خلکو غوښتي چې له هر فرصت څخه په استفادې خپل تر پنځو کلونو کم عمره ماشومانو ته د ګوزڼ ضد واکسین ورکړي.