تاند: ( دوشنبه، د جوزا لومړۍ) پاکستاني رسنۍ وایي د مۍ په نهمه په پاکستان کې د تحریک انصاف ګوند د قهرجنو لاريونونو پر مهال يوازې پښتونخوا کې تر 800 زیات کسان د ګډوډيو په تور نیول شوي دي.
د بشري حقونو د څار نړیوال سازمان هیومن رایټس واچ په پراخه کچه د عمران خان د پلويانو د نیول روان عمليات د اندېښنې وړ ګڼلي او له پاکستاني چارواکو څخه یې د دې لړۍ د ودرولو غوښتنه کړې ده.
د تحریک انصاف ګوند مشر عمران خان ادعا کړې، چې د حکومت ضدو لاريونونو له پیله تراوسه یې د ګوند تر 7000 زیات فعالین نیول شوي دي.
هیومن رایټس واچ بیا د نیول شویو کسانو شمیر 4000 ښودلی دی.
ويل شوي، چې په پښتونخوا کې د نيول شویو کسانو پر ضد د ترهګریزو فعالیتونو دوسيې اچول شوي او د تحریک انصاف ګوند مخکيني ايالتي وکيلان او وزيران هم پکې شامل دي.
د پاکستان حکومت د عمران خان د نیول شویو پلویانو د شمېر او برخليک په اړه څه نه دي ويلي.