تاند:( شنبه ، د غویي ۲۳ ) د پاکستان پوځ هغه وړاندوینې رد کړې، چې ګواکې پوځ بیا په دغه هېواد کې پوځي حکومت اعلانوي.
د پوځ ویاند جنرال احمد شریف چوهدري ویلي، چې پوځ د داسې کوم ګام اخیستو تابیا نه لري.
جنرال چوهدري دغه راز د پاکستان د پوځ د پاشلتیا په اړه د مخکیني صدراعظم عمران خان خبرداری بې بنسټه ګڼلی.
د هغه په وینا، عمران خان په ناسمو کړنو پاکستان کې ګډوډي جوړول غواړي.
په ورته مهال، په امریکا کې د پاکستان پخوانی سفیر حسین حقاني هم په یوه مقاله کې خبرداری ورکړی چې روان وضعیت د پاکستان پوځ د پاشلتیا خوا ته بیایي.
د پاکستان صدراعظم شهباز شریف بیا د پوځ پر مشر عاصم منیر د عمران خان تورونه رد کړي او ویلي، چې پاکستان به له ګواښونو وژغورل شي.