دوشنبه, فبروري 26, 2024
Homeخبرونهکابلوف: د دوحې ناسته د لویدیز د ناسم دریځ له امله بې...

کابلوف: د دوحې ناسته د لویدیز د ناسم دریځ له امله بې پایلې شوه

تاند:( شنبه ، د غویي ۲۳ )  د افغانستان لپاره د روسیې د ولسمشر ځانګړي استازي ضمیر کابلوف له “ټاس” سره په خبرو کې ویلي، چې په دوحه کې د افغانستان لپاره د ملګرو ملتونو وروستۍ غونډه د لویدیزوالو د ناسم دریځ له امله مثبته پایله نه لرله.

کابلوف د دې پوښتنې په ځواب کې چې ایا د دوحې ناستې د افغانستان د وضعیت د هواري لپاره ښه امکانات رامنځته کړي، وویل: نه، داسې نه وه.

د پوتین ځانګړي استازي د دې په څرګندولو سره چې روسیه د افغانستان په اړه د ملګرو ملتونو د سرمنشي انتونیو ګوتریش د هڅو هرکلی کوي، وویل: ګوتریش هڅه کړې چې د افغانستان په اړه زموږ له سیمه ییز ټیم سره د لوېدیځ وېشل شوي کمپونه متحد کړي.

کابلوف دې ته په اشارې سره چې د سیمې او لویدیځ هېوادونه د افغانستان په اړه د نه پخلاینې وړ اختلافونه لري زیاته کړه: موږ د سیمې هېوادونه لکه روسیه، چین، ایران، پاکستان، د منځنۍ اسیا هېوادونه او هند په دې باور یو چې لومړیتوب باید په افغانستان کې د ټول شموله مشرتابه رامنځته کول وي.

هغه ټینګار وکړ چې د داسې جوړښت رامنځته کول به په افغانستان کې د نورو مهمو مسلو لکه د ښځو د حقونو په حل کې مرسته وکړي.

د پوتین ځانګړي استازي همداراز څرګنده کړه: په عین حال کې باید له ترهګرۍ او نشه یي توکو سره د مبارزې مسایل چې ډېر مهم دي، هېر نه کړو.

نوموړي د افغانستان په اړه د لويديځ پر دغې تګلارې نيوکه وکړه، چې وایي طالبان بايد لومړى حقوقي مسايل حل کړي.

کابلوف زیاته کړه، دغه اختلافات په دې شرط حل کېدای شي، چې سیمه‌ییز دریځ د لوېدیځ پر وړاندې غالب شي.

دغه دیپلومات زیاته کړه چې د ملګرو ملتونو سرمنشي په دې ټولو مسایلو پوه شوی او وړاندیز یې کړی چې په نږدې راتلونکي کې بیا سره وګوري ترڅو د ګډې تګلارې د رامنځته کولو لپاره هڅې وکړي.

LEAVE A REPLY

Please enter your comment!
Please enter your name here

- Advertisment -

ادب