تاند:( پنجشنبه ، د غویي ۲۱ ) د پاکستان د سترې محکمې مشر عطا بندیال له بنده د مخکیني صدراعظم عمران خان د خوشې کولو امر کړی.
نوموړي دغه راز ویلي، چې د خان نیول کیدل غیر قانوني وو او دا نیونه به څېړل کیږي.
عمران خان تورن دی، چې د مالي فساد په یوه لویه قضیه کې یې پیسې اخیستي او د مفسدینو هم لاسی و.
هغه بیا دا تورونه رد کړي او د ځان خلاف سیاسي دسیسه ګڼلې ده.
د پخواني صدراعظم نیول کیدو په پاکستان کې پراخه ګډوډي رامنځته کړې ده.
د عمران خان پلویانو له څو ورځو راهیسې د پاکستان په بېلابېلو برخو کې له تاوتریخوالي ډک لاریونونه او د پوځ په ګډون د مختلفو دولتي بنسټونو پر ودانیو بریدونه کړي.
په بریدونو او اخ و ډب کې د یو شمېر کسانو د مرګ ژوبلې ترڅنګ ځینې ودانۍ زیانمنې شوي او د عمران خان تر دوه زرو زیات پلویان بندیان شوي.
نړیوالو له پاکستاني لوریو غوښتي، چې په خبرو رامنځته شوی کړکېچ حل کړي.