تاند:(شنبه، د غویي ۱۶ ) د تاجکستان د بهرنیو چارو وزیر سراج الدین مهردین، د شانګهای د همکارۍ سازمان په غونډه کې یو ځل بیا د افغانستان په شاوخوا کې د امنیتي کمربند د جوړولو غوښتنه وکړه.
نوموړي ومنله، چې څه موده مخکې یې د هېواد د ځواکونو او له افغانستانه د نیشه یي توکیو د اوښتو قاچاقبرو ترمنځ وسله واله نښته شوې او یو شمېر پوځيان یې پکې وژل شوي.
د افغانستان په شاوخوا کې د امنیتي کمربند د جوړولو پر پلان په ۲۰۰۱ کال کې افغانستان ته د امریکايي پوځیانو تر راتګ پورې بحث شوی و.
دا موضوع، تېر کال بیا د تاجیکستان د ولسمشر امام علي رحمان له خوا د ډله ییز امنیتي تړون د سازمان په غونډه کې مطرح شو.
د ګډ امنیتي تړون سازمان د ارمنستان، قزاقستان، قرغزستان، تاجکستان، ازبکستان او روسیې له هېوادونو څخه جوړ دی؛ تاجکستان د شانګهای د همکارۍ سازمان او د ډله ییز امنیت د تړون له مهمو غړو څخه دی.
روسیې او د یاد شوي سازمان یو شمېر نورو هېوادونو هم د طالبانو له بیا واکمنیدو سره د افغانستان او منځنۍ اسیا د هېوادونو ګډه پوله نا امنه شوې ګڼلې، خو طالب چارواکو دا څرګندونې رد کړي دي.