تاند:( پنجشنبه ، د غویي ۱۴ ) د کندهار ولایت مقام دننه، د ملا هبت الله اخند زاده په نوم یو جومات جوړ او ګټې اخیستنې ته وسپارل شو.
د طالبانو ولایتي ادارې ویلي، چې پر دغه جومات شاوخوا ۱۰۰ لکه افغانۍ لګښت شوی او پیسې یې د کندهار سوداګرو ورکړي دي.
طالب والي حاجي یوسف وفا په جومات کې، پر یوه وخت د څه باندې ۶۰۰ تنو د ګډ لمونځ د امکان خبر ورکړی.
دا په داسې حال کې ده، چې په افغانستان کې تر بل هر وخت اقتصادي او بشري ناورین زیات شوی او د خوړو نړیوال سازمان د هغو کسانو شمېر ۱۵ میلیونه تنه ښودلی، چې لوږې د مرګ عاجل خطر سره مخ کړي.
د طالبانو منتقدان دوی د جوماتونو او مدرسو په جوړولو کې په بېساري افراط تورنوي او وایي افغانستان پریمانه جوماتونه او مدرسې لري، خو طالب چارواکي د خپلو افراطي پریکړو له لاسه د وږو کړو خلکو د بیرته مړولو پر ځای په نمایشي دیني کړنو اخته دي.