تاند:( سې شنبه ، د غویي ۱۲ ) نا تایید شوي راپورونه څرګندوي، چې د طالبانو مشرانو په کندهار کې د دوحې غونډې له پای ته رسیدو وروسته، په خپل منځ کې د مهمې مشورتي غونډې تابیا نیولې ده.
ویل کیږي، چې دا غونډه ممکن د دوی د نا لیدل شوي مشر ملا هبت الله په مشرۍ ترسره او د طالبانو د کابینې ټول یا مهم غړي پکې برخه واخلي.
د راپورونو په اساس، د طالبانو یو شمېر مشران لا وار د مخه کندهار ته رسیدلي او د دې غونډې د ترسره کیدو انتظار باسي.
د تاند سرچینو ویلي، چې د طالبانو د پوهنې او کانونو او پټرولیم وزیران دمګړۍ په کندهار کې دي.
د دوحې غونډه کې تمه ده، چې نړیواله ټولنه طالب رژيم ته د بهرنیو تعاملاتو د دوام لپاره خپل اصول او شرطونه واضح کړي.
که څه هم د طالبانو کوم استازی په دغه غونډه کې برخه نه لري، خو د طالبانو مخالفان ادعا لري چې د دغې ډلې غیر رسمي استازیتوب د پاکستان د بهرنیو چارو وزارت مرستیاله حنا رباني کهر کوي.
د دوحې غونډې له پای ته رسیدو وروسته، په پام کې ده چې د طالبانو د بهرنیو چارو وزیر ملا امیرخان متقي پاکستان ته لاړ شي.
یاد شوی سفر ځینو څارونکو د دوحې ناستې له پریکړو د طالبانو خبریدو او په اړه یې پاکستاني چارواکو سره مشورو پورې تړلی.
له دې سره، تمه کیږي چې طالب مشران به کندهار کې هم د نړیوالو د وضع کیدونکو شرطونو پر وړاندې خپلې مشورې او پریکړې وکړي.
نړیواله ټولنه د طالبانو له لوري له زده کړو او کار څخه د میلیونونه افغان نجونو او ښځو په محرومیدو، د افغانستان له خاورې د سیمې او نړۍ هېوادونو ته د تروریستي خطرونو د ختمیدو، د بشري حقونو د تامین او او په افغانستان کې د ټول شموله حکومت د جوړیدو په اړه مشخصې غوښتنې لري.
طالب چارواکي بیا ټینګار کوي، چې افغان خاوره د چا خلاف نه کاریږي، دوی ټول شموله حکومت جوړ کړی او د ټولو حقونه یې تامین کړي.