تاند:( یکشنبه ، د غویي ۱۰ ) د طالبانو بهرنیو چارو وزارت ویلي، چې پاکستان له خپلو زندانونو ۵۶ افغان بندیان خوشې کړي.
د یاد شوي وزارت په یوه اعلامیه کې راغلي، چې دغه افغانان د پاکستان د سند ایالت په زندانونو کې بندیان وو.
طالبانو ویلي، چې دغه بندیان په پاکستان کې د دوی تر کنټرول لاندې د افغانستان د سفارت په هڅو خوشې او هېواد ته ستانه شوي.
سرچینې د بندي شویو افغانانو په اړه نور جزیات نه دي ورکړي.
له پاکستان څخه په وروستیو کې بیا د افغان پناه غوښتونکو د نیول کیدو او شکنجو خبرونه زیات شوي.
د طالبانو رژیم تل وایي، چې د دغه هېواد له زندانونو د افغان بندیانو د خلاصون هڅې کوي.
اخوا، د پښتون ژغورنې غورځنګ پلویانو ډېر ځله د یادو افغان بندیانو د خلاصون لپاره د هڅو خبر ورکړی.
افغان فعالان بیا وایي، چې طالبان باید د افراطي رژیم له اصلاح سره پاکستان ته د افغانانو د نه مجبوریت زمینه برابره کړي او هم پاکستاني چارواکو سره وغږیږي، چې افغان پناه غوښتونکي بندیان او شکنجه نه کړي.