تاند- په داسې حال کې چې د انترنیټ جي ۵ نسل لا هم په ټوله نړۍ کې عام شوی نه دی، چین غواړي چې جي ۶ وازمويي.
که څه هم جي ۵ د انترنیټ تر نورو نسلونو خورا پرمختللې ټکنالوژي ګڼل کېږي او په ډیرو هیوادونو کې یې د بې چلوونکي موټر په شان د پرمختللیو ټکنالوژیو کارولو ته لار هواره کړې ده، خو اټکل کېږي چې جي ۶ به تر جي ۵ هم انترنیټ چټک کړي او د مصنوعي ذهانت له لا پرمختګ سره به مرسته وکړي.
د نړۍ په بیلابیلو هیوادونو کې پر جي ۶ کار روان دی. په دغو هیوادونو کې یو هم چین دی چې پر جي ۶ کار کوي او غواړي چې ازمېښت یې کړي.
د دې بې سیمه او خورا چټک انترنیټ د ډاونلوډ سرعت به په هره ثانیه کې ۳۰۰ ګېګابایټه وي.
خو د چین د هوا- فضا د ساینس او ټکنالوژۍ د علومو دوهمه اکاډیمي، چې په پنځه ویشتم انستیتیوت مشهور دی، وايي چې په لومړي وار یې په هره ثانیه کې د ۱۰۰ ګیګابایټه ډاونلوډ سرعت ممکن کړی دی.
دې ته په پام چې اټکل کېږي چې جي ۶ تر ۲۰۳۰ پورې بازار ته وړاندې شي، دا ټکنالوژي ډیره مهمه ده او په موټر جوړولو، طبي خدماتو او تفریحي برخو کې زیاته کارېدای شي.