تاند:( یکشنبه ، د حمل ۲۷ ) د طالبانو بهرنیو چارو وزارت ویلي، چې پاکستان د اختر په مناسبت د پاتې افغان بندیانو د خوشې کولو ډاډ ورکړی.
دغه وزارت په یوه اعلامیه کې ویلي، چې په دې اړه د طالبانو د بهرنیو چارو وزیر مولوي امير خان متقي د پاکستان د بهرنیو چارو وزیر بلاول بوټو زرداري سره ټيليفوني خبرې کړي دي.
سرچینې ویلي، چې په دغو خبرو کې، د دواړو هېوادونو ترمنځ پر یو شمیر مهمو او دوه اړخیزو سیاسي، اقتصادي، ټرانزیټي او تجارتي مسایلوهم خبرې شوي دي.
ویل شوي، چې د بندیانو د خوشې کیدو غوښتنه ملا متقي کړې او پاکستاني وزیر په دې اړه ډاډ ورکړی.
طالبانو دا هم ویلي، چې پاکستان ورسره د دیپلوماتیکو اړیکو د ودې ډاډ ورکړی.
دوی د خوشې کیدونکو بندیانو شمېر او د دیپلوماتیکو اړیکو د ودې په اړه نور جزیات نه دي ورکړي.