تاند:( پنجشنبه ، د حمل ۲۴ ) کابل ښاروالۍ ویلي، چې له دغه ښاره د سړکونو او لښتيو د تخريب د مخنيوي په موخه یې پر ګرځنده موټر ویڼځلو بندیز لګولی.
د دغې ښاروالۍ لپاره د طالبانو چارواکو ویلي، چې يو شمېر کسانو په ناقانونه توګه د سړک تر غاړو د موټرو مينځلو ګرځنده ماشينونه فعال کړي، چې د سړکونو او لښتيو د ژر ويجاړېدو سبب ګرځېدلي دي.
د دوی په اعلامیه کې راغلي، چې د کابل ښاروالۍ د عامه تاسيساتو د تخريب په تړاو د دغو موټر مينځلو فعاليت غير قانوني بولي او د مخنيوي په لټه کې دي.
د ښاروالۍ مسوولينو دغه راز له ښاريانو او امنيتي بنسټونو غوښتي، چې د عامه تاسيساتو د ټينګښت په خاطر په دې برخه کې له ښاروالۍ سره همکاري وکړي.
یو شمېر خلکو د طالبانو دا کار ستایلی، خو ځینو نورو ویلي چې دا چاره د یو شمېر بېوزله او بې کاره کسانو له لوري ترسره کیده، چې دغه بندیز سره یې د رزق ګټلو دا وسیله بنده شوه.