تاند(سې شنبه، د حمل ۲۲مه) په افغانستان کې د ملګروملتو مرستندوی ماموریت، یوناما اعلان وکړ چې د طالبانو له لوري د ملګروملتو د ښځینه کارکوونکو پر کاربندیز د نړیوالو قوانینو خلاف دی او هغه نه عملي کوي.
یوناما په یوه خبرپاڼه کې خبرداری ورکړی چې ښځینه کارکوونکې یې کار ته دوام ورکوي او د دې بحران هر راز عواقب د طالبانو په غاړه دي.
یوناما ویلي:« دا بندیز د ملګرو ملتونو د منشور په ګډون د نړیوالو قوانینو له مخې غیرقانوني دی، نو په دې توګه يې ملګري ملتونه نشي منلی.»
که څه هم یوناما په زغرده نه دي ویلي چې د طالبانو د مقاومت په صورت کې به څه وکړي خو د خبرپاڼې له لحنه یې داسې ښکاري چې د طالبانو د خنډ په صورت کې ښايي ملګري ملتونه او اړوندې مرستندویې موسسې یې په افغانستان کې خپل ټول فعالیتونه ودروي.
یوناما ټینګار کړی چې د طالبانو له لوري د ملګروملتو په ادارو کې د ښځو پر کار د بندیز د ټولو اړخونو او عواقبو جاج اخلي او که د طالبانو له مخنیوي سره مخامخ شول، خپل فعالیت به ودروي.
په خبرپاڼه کې په نسبتاً تونده ژبه د ملګروملتو په ادارو کې د طالبانو له لوري د ښځو د کار بندیز غندل شوی دی.
د افغانستان لپاره د ملګروملتو مرستندوی دفتر همداراز ویلي چې طالبان د ښځو د کار د مخنیوي په وسیله غواړي چې ملګري ملتونه اړ باسي څو یا په افغانستان کې د خپل فعالیت د دوام او یا پر خپلو نړیوالو ژمنو او مقرراتو د درېدو ترمنځ یو انتخاب کړي.
په خبرپاڼه کې یادونه شوې چې په افغانستان کې د ملګروملتو د سرمنشي استازې او د یوناما مشره روزا اوتنبایوا په دې اړه غور پیل کړی او د راتلونکې میاشتې تر پنځمې نېټې پورې به خپل دریځ اعلان کړي.
ملګروملتو په عین حال کې ویلي، ټولو ملي کارکوونکو – ښځو او نارینه وو – ته لارښوونه شوې چې د ملګرو ملتونو په دفترونو کې دندو ته ولاړ نشي، خو ديو لړمهمو کارونو لپاره محدوده او محاسبه شوې استثنا موجوده ده.