تاند:( چار شنبه، د حمل ۹ ) د طالبانو د ریاست الوزراء سیاسي مرستیال مولوي عبدالکبیر او له افغان شخصیتونو سره د دوی د تماس کمېسیون نن په خپله ناسته کې د راستنو شویو افغان شخصیتونو پر ستونزو خبرې کړي.
د کمیسیون د غونډې په حواله خپور شوی راپور وایي، چې په غونډه کې د دغو شخصتیونو د ستونزو پر حل، هغوی ته د ډاډمن ژوند او چاپیریال پر چمتو کولو او نورو اړوندو مسایلو بحث وشو.
طالبانو د دغو افغان شخصیتونو ستونزې او په خاص ډول د ژوند د نه « ډاډمن والي» موضوع نه ده روښانه کړې.
د طالبانو دغه کمیسیون، چې هېواد ته د زیاتو بهر ته تللو افغان مطرحو څېرو د ستنولو په نیت جوړ شوی و، تراوسه یې ایله د شاوخوا ۵سوو تنو په ستنولو د بریالي کیدو خبر ورکړی.
طالبانو په دغو کسانو کې د مدني فعالانو، د امنیتي او دفاعي ځواکونو د ټیټ پوړو مسوولینو په کچه خلک هم یاد کړي.
د دې ترڅنګ په محدوده کچه یو شمېر مطرح سیاستوال او پخواني چارواکي هم د طالبانو په ډاډ هېواد ته ستانه شوي وو، چې ویل کیږي یا بیرته په وتو بریالي شوي او یا د طالبانو د ورکړو ژمنو د نه عملي کیدو له امله ګڼو ستونزو سره مخامخ دي.