تاند:( پنجشنبه، د حمل ۳) د هلمند لپاره د طالبانو چارواکو د دغه ولایت په مرکز او ټولو ولسوالیو کې د ورښتونو خبر ورکړی.
ځایي خلکو ویلي، چې د ورښتونو زیاتوالي د وچکالۍ کمیدو په اړه هیله من کړي دي.
په وروستیو کې د افغانستان د نورو ولایتونو په شان د هلمند خلک هم سختو وچکالیو ځپلي دي.
په دغه ولایت کې د وچکالۍ له امله د کرنیزو حاصلاتو د کموالي ترڅنګ د مالدارۍ برخه هم اغېزمنه شوې ده.
یو شمېر خلکو بیا پر طالب چارواکو نیوکې کړي، چې په الهي ورښتونو خلکو ته د زېري اعلانونه کوي، خو خپله د خلکو ژوند او ستونزو ته د رسیده ګۍ کوم پروګرام او د مسوولیت احساس نه لري.