تاند(پنجشنبه، د حمل ۳ مه) د افغانستان لپاره د ملګروملتو د مرستندوی ماموریت (یوناما) مرستیال د طالبانو د ريیس الوزرا له مرستیال سره په کتنه کې د نجونو پر مخ له شپږمه پورته ښوونځیو او پوهنتونونو د پرانیستلو غوښتنه وکړه.
د یوناما له خبرپاڼې سره سم، د افغانستان لپاره د ملګروملتو د مرستندوی ماموریت مرستیال مارکس پوڅل (پوتزل) د طالبانو د ريیس الوزرا له مرستیال مولوي عبدالکبیر سره په کتنه کې وویل چې په افغانستان کې د نجونو د زده کړو په اړه د ملګروملتو او نړیوالې ټولنې دریځ بدلېدونکی نه دی.
د ملګروملتو پر اساس، څه باندې یو میلیون افغان نجونې له زده کړو بې برخې کړای شوې دي.
له بلې خوا د ملګرو ملتو د ماشومانو د ملاتړ صندوق (یونېسف) وایي، سږکال په افغانستان کې شپېته فیصده نجونې له زدهکړو پاتې شوي دي.
د یونېسف د زدهکړو د برخې مسوولې ادریانا وګیلار وویل چې یو ملیون نجونې د طالبانو د فرمان له امله اغېزمنې شوې دي.
له بلې خوا د جاپان سفارت په افغانستان کې د تعلیمي کال له پیلېدو سره هممهاله په دې خواشیني ښکاره کړې چې نجونې بیا هم له زده کړو محرومې شوې دي.
د ملګروملتو د ماشومانو د ملاتړ د صندوق په باور د نجونو پر زدهکړو بندیزونه په مستقیم ډول د افغانستان د نجونو او ښځو پر راتلونکو نسلونو منفي اغېز پرې باسي.
په همدې منځ کې د قطر مرستندویې ادارې د طالبانو د حکومت د پوهنې وزارت سره یوه موافقه لاسلیک کړې چې پر اساس به یې دا اداره په خپل مالي ملاتړ ۳۰ زره افغان ماشومانو ته، چې له زده کړو پاتې دي، د زده کړو اسانتیا برابروي.