تاند:( یکشنبه، د کب ۲۱) د طالبانو د رژیم د کانونو او پټرولیم وزارت، د کندهار ولایت د سمنټو پروژې د قرارداد د لاسلیک خبر ورکړ.
دغه وزارت د یوې خبرپاڼې په خپرولو سره ویلي دي: د کندهار ولایت د شور اندام سمنټو پروژې تړون، پرون د کانونو او پټرولیم وزارت د سرپرست شیخ الحدیث شهاب الدین دلاور او د احمد نبیزاده شرکت د رئیس له لوري لاسلیک شو.
د وزارت د معلوماتو له مخې؛ د کندهار د شوراندام سمنټو پروژه د شاوخوا ۱۰۰ میلیونه ډالرو په پانګونې سره د اکتشاف، استخراج او پروسس په پړاو کې ده، چې کلنی تولید یې شاوخوا یو میلیون ټنه سمنټو ته رسېږي.
چارواکي وایي په دې پروژه کې به پنځه زره کسانو ته د کار زمينه برابره شي.