تاند: ( یک شنبه، د کب ۲۱ مه) په بلخ کې د طالبانو امنیتي چارواکو په تبیان فرهنګي مرکز کې د پرونۍ چاودنې پړه د دغه مرکز پر مسوولینو اچولې او ویلي، چې یاد شوي مسوولین یې نیولي دي.
د طالبانو د امنیه قومندانۍ ویاند محمد آصف وزیري په یوه ویډیویي کلېپ کې وویل:(( دا پېښه چې رامنځته شوې، عامل یې خپله د تبیان فرهنګي مرکز مسوولین دي. دوی نه زموږ امنیتي ځواکونه او نه د اطلاعاتو او فرهنګ ریاست په خپله غونډه خبر کړي وو، موږ یې مسوولین نیولي او له پوښتنو وروسته پرې قانون تطبیقوو)).
طالب ویاند د تبیان فرهنګي مرکز د نیول شویو مسوولینو د شمېر او نورو جزیاتو په اړه څه نه دي ویلي.
په تبیان فرهنګي مرکز کې پرون په داسې مهال چاودنه رامنځته شوه، چې دغه مرکز د ځایي خبریالانو ستاینغونډه بللې وه.
د طالبانو ځایي چارواکو ویلي، چې په دغه چاودنه کې یو تن وژل شوی او ۵ خبریالان ټپيان شوي دي.
ځینو سرچینو د پېښې د وژل شویو شمېر ۲ تنه او د ټپيانو شاوخوا ۳۰ تنه ښودلی دی.
د تبیان فرهنګي مرکز مسوولینو د پېښې د مرګ ژوبلې او د طالبانو د لګولو تورونو په اړه څه نه دي ویلي.
د خبریالانو د دفاع ملي او نړیوالو بنسټونو یاده پېښه غندلې او په افغانستان کې د خبریالانو پر وړاندې د تاوتریخوالي او نه خوندیتوب د کچې پر زیاتوالي یې اندیښنه ښودلې ده.
دیرداحتیاط وخت دی په ظاهریوپه باطن بل سه دی