تاند:( سې شنبه، د کب ۱۶) د افغانستان د مشهور ملي هنرمن جاوید امیرخېل « بېلتون» سندره په هېواد پسې د نوموړي له ژړغوني ویډیو سره رسنیزه شوه.
امیرخېل په بېلتون سندره کې هم د نورو زیاتو سندرو په شان د وطن، ملت او خاصتاً لرو برو پښتنو د ویرونو فریاد کړی او په دغه بده ورځ یې د ملایانو په خاموشۍ انتقاد کړی.
په ورته وخت کې، د پښتو ولسي شاعر پرهیز شګیوال چې پاکستان ته تللی او له جلا وطنه امیرخېل سره یې لیدلي وو، له نوموړي سره د مخه ښې د شېبې ویډیو رسنیزه کړې ده.
په ویډیو کې شګیوال وایي، چې امیرخېل ورته پر خپلو هېوادوالو د سلام ویلو غوښتنه کوي.
ویډیو څرګندوي، چې امیرخېل دغه مهال د هېواد په بېلتون اوښکې تویوي او شګیوال یې له اوښکو پاکولو سره ورته وایي: همدا اوښکې به دې هېواد ته ځان سره یوسم.
له بېلتون سندرې سره هم مهاله، د جاوید امیرخېل د ژړا ویډیو هم په ټولنیزو رسنیو کې زیاته خپره شوې او زیاتو افغانانو، خاصتاً جلا وطنو له امیرخېل سره په دغه ویر کې ځانونه شریک ګڼلي.
د امیرخېل مینه والو او نورو افغانانو د طالبانو پر رژیم انتقاد کړی، چې د دوی په وینا د افغانستان له دوزخ ګرځولو سره یې امیرخېل غوندې میلیونونه افغانان جلاوطنه کړي او په پردو هېوادونو کې ذلیله کړي دي.
د امیرخېل د بیلتون سندره پر دې لینک لیدلی شئ: