تاند:( دوشنبه، د کب ۱۵) ایراني حکومت نن د طالبانو ادارې سره د هوکړې له مخې، د هرات د اسلام قلعه بندر له لاري (۲۶۸) تنه افغان بندیان چې په ایران کې زنداني وو، د طالبانو ادارې ته وسپارل.
په یادو مراسمو کي په تهران کي د افغان سفارت لپاره د طالبانو د ادارې سرپرست مولوي فضل محمد حقاني، د زندانونو عمومي مسئول مولوی محمد یوسف مستري، په هرات کی د طالبانو د بهرنیو چارو ریس مولوي شیر احمد عمار او نورو طالب مسئولینو ګډون کړی و.
د طالبانو د بهرنیو چارو وزارت مرستیال ویاند حافظ ضیا احمد وایي، دغه توافق څو ورځې وړاندې ایران ته د طالبانو د لوی څارنوال په مشرۍ د ورغلي پلاوي په مذاکراتو کې شوی و.
طالب چارواکو د ایران د دغه ګام ستاینه کړې ده.
معلومه نه ده، چې طالبان دغه بندیان خپلو کورونو که خپلو زندانونو ته لیږدوي.