تاند: ( دوشنبه، د حوت ۸ ) د طالبانو د ادارې ویاند ذبیح الله مجاهد ادعا کوي، چې د کابل په خیرخانه کې د پرون ماښام د عملیاتو پر مهال یې ځواکونو په افغانستان کې د داعش ډلې عمومي عملیاتي او نظامي مشر وژلی.
مجاهد په یوه اعلامیه کې د نوموړي کس نوم قاري فاتح ښودلی او ویلي، چې د داعش د خراسان څانګې د امنیت یا استخباراتو مشر و.
د مجاهد د معلوماتو له مخې، قاري فاتح په کابل کې پر بهرنیو دیپلوماتیکو مرکزونو، جوماتونو او ځینو نورو سیمو د پېچلو عملیاتو مستقیمه قومانده پر غاړه لرله.
هغه د تېر ماښام په عملیاتو کې د نوموړي په ګډون د دوو داعشیانو د وژل کیدو او یوه بل د نیول کیدو خبر ورکړی و.
طالبانو په ځلونو د داعش ډلې د ځپلو ادعاوې کړي،خو وروسته بیا د دې ډلې فعالیتونه او بریدونه لیدل شوي.
داعش ډله د طالبانو د داسې ادعاوو په اړه معمولاً غبرګون نه ښيي.