تاند: ( شنبه، د حوت ۶ ) د طالبانو د کرنې وزارت د طبعي زيرمو رئیس مولوي عبدالاحد خليل د ننګرهار دره نور ولسوالۍ ته سفر په ترڅ کې ویلي، چې په دغه ولسوالۍ کې ملي پارک جوړوي.
د هغه په وینا، له دې سره به دغې سمسورې او غره ییزې سیمې ته ډيری سيلانيان را جلب او ور سره به د سيمې خلکو اقتصاد پياوړی شي.
نوموړي وويل، چې په ټول هېواد کې د ځنګلونو ساتنې په موخه جدي هلې ځلې کوي او د دې ولايت ځنګلونو ته يې د ښې پاملرنې هوډ وښوده.
د کرنې وزارت د طبعي زيرمو لوی رئيس په دره نور ولسوالۍ کې د نيالګيو قوريو څخه هم ليدنه وکړه او زياته يې کړه چې راتلونکي کې به زيات نيالګي وروزي.
دره نور د ننګرهار له هغو ولسوالیو څخه دی، چې ډېر سیلانیان یې لیدو ته ورځي او له طبیعي منظرو یې خوند اخلي.
د طالب چارواکو ورته څرګندونې د خلکو هرکلي سره مخ کیږي.
ځينې خلک په داسې څرګندونو شک څرګندوي او وایي په عمل کې به وویني، چې طالب چارواکي پر ژمنو دریږي کنه.