تاند: ( چارشنبه، د حوت ۳ ) د ډيپلومات په نوم مشهوره خپرونه په یوه تازه تحلیلي مطلب کې وایي، چې د روسیې په محوریت د افغانستان په اړه د سیمه ییزو اندیښنو د حل لپاره امنیتي همغږي یا اجماع د رامنځته کیدو په حال کې ده.
دغه خپرونه په مسکو کې په دې اړه ترسره شوې وروستۍ غونډې ته اشاره کوي او لیکي، چې د سیمې دوه رقیب هېوادونه هندوستان او پاکستان له ټولو خپلمنځیو اختلافاتو سره بیا هم پر افغانستان د طالبانو له حاکم رژیم څخه ورته اندیښنې لري.
دغه رسنۍ لیکي: ((د هند د ملي امنیت سلاکار اجیت دووال پر پاکستان نیوکه کړې او ویلي یې دي چې هېڅ هېواد ته به اجازه ورنه کړي چې د افغانستان خاوره د ترهګرۍ د صادرولو لپاره وکاروي. هغه د نوي ډیلي ژمنه هم تکرار کړه چې له افغانانو سره ودریږي. له نیمګړتیاوو سره سره، تر دې دمه، چې په افغانستان کې د طالبانو واکمنۍ د هند پر امنیتي وضعیت منفي اغېز کړی. د افغانستان له خاورې د ترهګرۍ ګواښ د نوي ډیلي لومړنۍ اندېښنه ده.په زړه پورې خبره دا ده چې پاکستان هم پر طالبانو ورته تورونه لګوي. د ۲۰۲۲ کال د سپتمبر په ۲۴ مه د ملګرو ملتونو عمومي غونډې ته د وینا پر مهال د پاکستان لومړي وزیر شهباز شریف «له افغانستان څخه د سترو ترهګرو ډلو د فعالیت ګواښ» ته اشاره وکړه.))
د دغې رسنۍ په باور هر هېواد له طالب واکمنۍ خپلې اندیښنې لري. پاکستان یې د پاکستاني طالبانو په ملاتړ تورنوي، خو د نورو ډېرو هېوادونو اندیښنه په افغانستان کې د داعش ډلې له سر پورته کولو څخه ده او ډېر هېوادونه د دې ډلې د مهارولو په اړه طالبان په خپلو ژمنو کې پاتې بولي.
دا په داسې حال کې ده، چې طالب چارواکي بیا ورته اندیښنې بې ځایه بولي او د داعش ډلې په ځپلو ټينګار کوي.
طالبان ټينګار کوي، چې د افغانستان په اړه هیڅ بحث او غونډه د دوی له ګډون پرته بشپړه نه ده او پریکړې یې عملي او موثرې نه شي تمامیدای.