شنبه, مې 25, 2024
Homeخبرونهمجاهد: کابل کې د الظواهري وژل کیدل لا ثابت شوي نه دي

مجاهد: کابل کې د الظواهري وژل کیدل لا ثابت شوي نه دي

تاند: (شنبه، د دلوې ۲۹ مه) ‏د طالبانو د رژیم ویاند ذبیح الله مجاهد وایي، چې په کابل کې د القاعدې شبکې د مشر ایمن الظواهري د وژل کیدو موضوع تر اوسه پورې ثابته شوې نه ده.

نوموړي په یوه تازه مرکه کې وویل، چې په دې اړه لا هم څېړنې روانې دي.

د طالبانو ویاند ونه ویل، چې د الظواهري د وژل کیدو په اړه به د دوی څېړنې کله بشپړې شي.

هغه دا هم روښانه نه کړه، چې د کابل په شېرپور سیمه کې د القاعدې د مشر د وژل کیدو په نوم د امریکا د بې پيلوټه الوتکې په ترسره شوي برید کې څوک وژل شوي وو؟

د امریکا متحده ایالاتو ولسمشر جوبایډن شاوخوا شپږ میاشتې مخکې اعلان وکړ، چې بې پيلوټه الوتکې یې د القاعدې شبکې مشر ایمن الظواهري په کابل کې وژلی.

تېره اونۍ ملګرو ملتونو په یوه راپور کې وویل، چې القاعدې شبکې د خپل مشر ایمن الظواهري له وژل کیدو وروسته خپل یو بل مخکښ غړی سیف العدل، چې د مصر اوسیدونکی دی او په ایران کې ژوند کوي، خپل نوی مشر ټاکلی.

ځینو څارونکو د طالب ویاند تازه څرګندونو ته حیراني ښودلې، چې څنګه القاعده له دومره نړیوال نظارت سره د بل مشر په ټاکلو توانیدلی، خو د طالبانو رژیم لا نه ده معلومه کړې، چې الظواهري کابل کې وژل شوی که نه دی وژل شوی.

LEAVE A REPLY

Please enter your comment!
Please enter your name here

- Advertisment -

ادب