تاند: ( چارشنبه، د دلوې ۲۶مه) د طالبانو د کډوالو او بیرته را ستنیدونکو چارو وزیر مولوي خلیل الرحمان حقاني نن له افغانستان څخه د پخواني شوروي ځواکونو د وتو د کلیزې په یاد غونډه کې پخوانی قومندان احمد شاه مسعود په کنایوي ډول، د پخواني شوروي خلاف د جګړې پر مهال له روسانو سره په پټو معاملو تورن کړ.
خلیل الرحمان حقاني پرته له دې، چې د احمد شاه مسعود نوم واخلي، نوموړی له روسانو سره په پټو لیدنو او معاملو تورن کړ او ویې ویل، چې په دې اړه د تاریخ کتابونه وګورئ.
هغه په ورته وخت کې، د هغو کسانو په نومونو د واټونو، ودانیو او څلور لارو د نومول پاتې کیدو مخالفت وکړ، چې په وینا یې بهرنیانو سره یې ښکاره او پټې معاملې کړي دي.
نوموړي یاده خبره هم پر احمد شاه مسعود د کنایوي نیوکو پر وخت وکړه.
حقاني شبکې مخکې احمد شاه مسعود ته په ښه سترګه کتل او خپله خلیل الرحمان حقاني د طالبانو د بیا واکمنیدو په لومړیو ورځو کې د یوې وینا پر مهال احمد شاه مسعود د افغانستان «ملي اتل» ګڼلی و.
د طالبانو د کډوالو وزیر غوښتنه وکړه، چې د افغانستان مهمې ودانۍ او لارې باید د هغو خلکو په نومونو شي، چې د ده په وینا قربانۍ او شهیدان یې ورکړي، یا یې د بهرنیانو خلاف جګړو کې زندانونه ګاللي.
د طالبانو یاد شوي وزیر په داسې مهال دا څرګندونې کړي، چې مخکې د قومندان مسعود نورو مخالفانو هم نوموړی د شوروي خلاف د جګړې پر مهال له روسانو سره په پټو معاهدو تورن کړی و.
د مسعود پلویان بیا له روسانو سره، افغانستان نه د هغوی د سرتېرو د وتو پر مهال د مسعود تړون توجیه کوي او وایي، هغوی له دې پرته هم وتل او اړتیا نه وه، چې مسعود جګړه ورسره کړې وای.
د طالبانو منتقدین بیا دوی په ورته ډول له افغانستان څخه د امریکایي ځواکونو د وتو پر مهال، له یاد شوي هېواد سره د دوحې تړون په نوم په پټو استخباراتي معاملو تورنوي.
طالبانو بیا په دې اړه تورونه رد کړي دي.