تاند:( سی شنبه، د دلوې پينځه ويشتمه) د کندهار لپاره د طالبانو د ادارې دد بهرنیو اړیکو رئیس مولوي حقاني د ايران د اسلامي انقلاب په کليزه کې، د ايران دغه انقلاب د مسلمانانو روح ګڼلی.
نوموړي پرون په دغو جوړو شويو مراسمو کې وویل: (( د ایران اسلامي انقلاب د ټولو مسلمانانو روح دی، کله چې یوه اسلامي ټولنه او یا اسلامي هیوادونه وي، انقلاب د هغوی لپاره روح دی .))
هغه زیاته کړه: اوس د ایران اسلامی انقلاب د ازادو مسلمانانو او نړۍ لپاره یوه بیلګه ګرځیدلې ده.
په دې مراسمو کې د ايران سرکونسل هم د خپل هېواد د اسلامي انقلاب، امريکا ضدو سياستونو، قاسم سلیماني او د افغانستان پر وړاندې ېې د سياستونو ستاينه کړې ده.
په افغانستان کې د طالبانو له بيا واکمنيدو وروسته، د ايران د ورته مراسمو نمانځه پراخه شوې ده.
د چارو شنونکي ايران ته د طالبانو دومره نيږدې کيدل د دوی او افغانستان په تاوان بولي او ورڅخه غواړي چې متوازن او مستقل سياست دې ولري.