تاند:( پنجشنبه، د دلوې شلمه) د روسیې د ملي امنیت شورا سیکرټر نیکولای پېټروشیف په افغانستان کې د بهرنیو ځواکونو د پاتې وسلو په اړه اندېښنه ښکاره کړې ده.
نوموړي ویلي، چې د دغو وسلو په وسیله ناارامي د سیمې ټولو هېوادونو ته تلای شي.
نیکولای پېټروشیف د چارشنبې په ورځ د افغانستان په اړه په مسکو کې د سیمې د هېوادونو امنیتي غونډه کې دا انديښنه ښودلې ده.
پېټروشیف ویلي:”موږ د څه باندې زرو بکتربند موټرو، عسکروړونکو ټانکونو، په درځنونو الوتکو او هیلیکپټرو، د سلګونه توپخانو، مارټر توپو، د ټانک او الوتکې ضد سیسټمونو او لکونه سپکو او درنو وسلو په اړه خبره کوو چې لسګونه ميليارده ډالره ارزښت لري”.
د روس د ملي امنیت سلاکار وایي کېدای شي دا وسلې او جنګي وسایل هم په افغانستان کې دننه د بېلابېلو ډلو تر منځ د جګړو د زیاتېدو سبب شي او هم په غیرقانوني لارو په تور بازار کې خرڅ شي.
پېټروشیف دا اندېښنه هم ښکاره کړې چې کېدای شي دا وسلې د نورو هېوادونو د ترهګرو ډلو لاسونو ته ورشي.
هغه وایي په دې توګه امکان لري “په افغانستان کې د ناارامۍ مرکز- چې د ده په وینا لوېدیځو هېوادونو جوړ کړی- د سیمې ټولو ملکونو ته وغزېږي”.
طالبانو په دې اړه څه نه دي ويلي، خو تېر کال یې هغه راپورونه رد کړي وو چې ګوندې د بهرنیو ځواکونو پاتې وسلې په پټو لارو ګاونډي پاکستان ته وړل کېږي.
د امریکې د دفاع وزارت په وينا، امریکا د افغانستان امنیتي ځواکونو ته له 2005م تر 2021م کال پورې د 18.6 ميليارده ډالرو په ارزښت پوځي وسایل ورکړي وو.