تاند:( سې شنبه، د دلوې يوولسمه) د طالبانو د رژيم چارواکي وايي، چې د افغانستان تر ټولو په ستر اقتصادي زون د بګرام اډې د بدلولو پلان لري.
د طالبانو د اقتصاد وزارت مسلکي مرستيال ډاکټر لطيف نظري ويلي، چې په دې اړه لومړني مطالعات پيل شوي دي.
د هغه په وينا، هيله من دي چې ژر په دې اړه پايلې ته ورسيږي او عملي چارې پيل کړل شي.
دغه طالب مقام د بګرام اډې موقعيت، پراخوالی، له هوايي ډګر سره نیږدې والی او پکې شته پراخ امکانات او وسايل د هېواد په تر ټولو ستر اقتصادي زون د دغې اډې د بدلولو هڅونکي لاملونه ګڼلي.
يو شمېر اقتصادي شنونکو د طالبانو د دغه پلان ستاينه کړې او ویلي، چې د دغه اقتصادي زون له فعالولو سره به د افغانستان د هوايي دهليزونو پروژې هم کاميابې او اقتصاد ډېره وده وکړي.
بګرام اډه، په افغانستان کې د امریکا د شل کلن نظامي حضور پر مهال، د دغه هېواد تر ټولو ستره پوځي اډه وه.